Psalms 96
Piŋkop da mɨŋat amɨn kabɨnikon aŋpak tagɨsi asak
1Yawe do kap kalugɨ kɨnda yaŋ ɨmni.Mɨktɨmɨ mɨktɨmɨ amɨn ekwaŋ, ji Yawe do kap yaŋ ɨmni.
2Yawe do kap yaŋ ɨmɨŋek mani aŋkɨsini.
Gɨldarɨ gɨldarɨ amɨn yokwikon baŋ tɨmɨk tɨmɨk asak uŋun dakon geni yaŋ teŋteŋoni.
3Amɨn kɨsisi mɨktɨmɨ mɨktɨmɨ ekwaŋ tɨlɨmni gat ae yo masɨ masɨmɨsi asak uŋun do yaŋ teŋteŋaŋ yomni.
4Yawe uŋun wagɨl tagɨsisi, do aŋkɨsiŋ kɨmorɨsi.
Uŋun kokup kɨdat morap yapmaŋdak, do si pasal ɨmɨmɨsi.
5Mɨktɨm dɨwarɨ dakon piŋkopni uŋun kokup kɨdat dakon wupmɨ gɨn.
Mani Yawe da kundu wasagɨt.
6Yawe uŋun kɨla amɨn madep egek man madepni taŋ ɨmɨsak.
Tapmɨmni madep gat ae yo morapni kɨldani tagɨsi telagɨ yutnikon taŋ ɨmaŋ.
7 a Mɨŋat amɨn kabɨ morap, yaŋ sɨmɨl aŋek Yawe dakon tɨlɨmni gat ae tapmɨm madepni gat do yoni.
8Yaŋ sɨmɨl aŋek tɨlɨm madepni do nandaŋek Yawe aŋkɨsini.
Paretji tɨmɨgek Telagɨ Yut Madepni da nagalgwan pɨgɨni.
9Uŋun telagɨsi ae tɨlɨmni ŋwakŋwarɨsi, do Yawe gawak ɨmni.
Amɨn mɨktɨmɨ mɨktɨmɨ ekwaŋ, ji nɨmnɨmɨgek pasal ɨmni.
10Mɨktɨmɨ mɨktɨmɨ egɨ aŋaŋ kwaŋ uŋun dakon amɨn yaŋ yoyɨni, “Yawe uŋun kɨla amɨn madep egɨsak.
Uŋun da mɨktɨm daman aŋteban aban wayɨŋ dɨma asak.
Yawe da don gen kokwin pi kɨlegɨsi aŋek amɨn dakon aŋpak kokwin akdɨsak.”
11Kundu gat mɨktɨm gat, jil kɨsɨk kɨsɨk anjil.
Tap ɨdap, gak wayɨŋ madepsi aŋek kɨsɨk kɨsɨk abi.
Ae yo morap tap kagagwan toŋ, jiyo kɨsi kɨsɨk kɨsɨk ani.
12Jap pi gat ae yo morap uŋungwan toŋ, ji kɨsɨk kɨsɨk ani.
Uŋun bɨsapmon kɨndap morap koron toŋ uŋun kɨsɨk kɨsɨk kap yokdaŋ.
13Yawe da buron kɨsɨk kɨsɨk akdaŋ, nido Yawe abɨŋ gen kokwin aŋek mɨktɨm daman kɨsi dakon mɨŋat amɨnyo dakon aŋpak kokwin aŋ yomdɨsak.
Aŋpak kɨlegɨkon da, ae gen bamɨkon da, mɨktɨmon mɨŋat amɨn morapyo gen kokwin aŋyomdɨsak.
Kap 97
Copyright information for
YUT